Kushtet e shërbimit

1. Shërbimi

AsistentiAI ofron një asistent me inteligjencë artificiale që u përgjigjet klientëve të biznesit tuaj, bazuar vetëm në njohuritë që ju na jepni ose që lexohen nga faqja juaj zyrtare. Asistenti është projektuar të mos shpikë përgjigje: kur nuk e di diçka, e shënon bisedën dhe ia kalon një personi nga ekipi juaj.

2. Planet dhe kufijtë

• Starter — $120/muaj, deri në 1000 përgjigje të agjentit në muaj; konfigurimi nga ekipi ynë $149, një herë ($0 kur biznesi e konfiguron vetë).
• Professional — $220/muaj, deri në 3000 përgjigje të agjentit në muaj; konfigurimi nga ekipi ynë $249, një herë.
• Business — $550/muaj, deri në 10 000 përgjigje të agjentit në muaj; konfigurimi nga ekipi ynë $499, një herë.

Njësia e planit është përgjigja e agjentit (çdo mesazh që agjenti i dërgon një klienti), pavarësisht sa mesazhe ka një bisedë. Çmimet janë pa TVSH. Konfigurimi paguhet një herë, në fillim. Kufijtë janë të butë: nëse i tejkaloni, asnjë bisedë nuk ndërpritet në mes — përgjigjet shtesë faturohen $30 për çdo 1.000, ose kalojmë bashkërisht në planin e përshtatshëm. Me pagesë vjetore paraprakisht, 2 muajt e parë të tarifës mujore janë falas (përgjigjet shtesë faturohen si zakonisht). Enterprise: me marrëveshje, me ofertë më vete.

3. Përgjegjësitë tuaja

• Të dhënat që i jepni asistentit (çmime, orare, politika) duhet të jenë të sakta dhe të përditësuara.
• Ju jeni përgjegjës për përmbajtjen që publikoni përmes asistentit te klientët tuaj.
• Nuk lejohet përdorimi i shërbimit për mashtrim, përmbajtje të paligjshme apo shqetësim.
• Nëse lidhni WhatsApp, Instagram ose Messenger, duhet të respektoni edhe kushtet dhe politikat tregtare të Meta-s dhe të WhatsApp-it, si dhe t'u përgjigjeni vetëm klientëve që ju kanë shkruar ose kanë pranuar të kontaktohen. Kanalin mund ta shkëpusni në çdo kohë nga paneli; token-at e lidhjes fshihen menjëherë.

4. Pronësia dhe mbrojtja e platformës

AsistentiAI — softueri, paneli, agjenti me udhëzimet dhe rregullat e tij, emri dhe logoja — është pronë e AsistentiAI dhe mbrohet nga ligji për të drejtën e autorit dhe për pronësinë industriale. Ju jepet e drejta ta përdorni shërbimin për biznesin tuaj, gjatë kohës së bashkëpunimit. Nuk lejohet — as nga ju, as nga kolegët që shtoni në panel, as nga llogaritë e provës:

• inxhinieria e kundërt, dekompilimi ose çdo përpjekje për të nxjerrë kodin, udhëzimet, rregullat ose mënyrën si funksionon agjenti;
• kopjimi automatik (scraping, robotë, programe) i panelit, i demos, i chat-it ose i të dhënave, si dhe përdorimi i shërbimit përtej punës së zakonshme të biznesit tuaj;
• përdorimi i shërbimit, i demos ose i informacionit të marrë prej tyre për të ndërtuar ose trajnuar një produkt konkurrues;
• shitja, dhënia me qira ose ndarja e aksesit me palë të treta.

Për të mbrojtur të gjitha bizneset, ne monitorojmë përdorimin e pazakontë të platformës. Në rast shkeljeje mund ta pezullojmë ose ta mbyllim llogarinë menjëherë dhe rezervojmë të drejtën për veprim ligjor dhe për dëmshpërblim.

5. Kufizimi i përgjegjësisë

Asistenti është mjet ndihmës dhe mund të gabojë. Ju rekomandojmë të mbikëqyrni bisedat nga paneli, sidomos ato të shënuara si "Ju kërkon". Nuk mbajmë përgjegjësi për vendime tregtare të marra vetëm mbi bazën e përgjigjeve të asistentit, as për humbje indirekte. Shërbimi ofrohet "siç është", me përpjekje të vazhdueshme për disponueshmëri dhe cilësi.

6. Të dhënat

Njohuritë dhe bisedat e biznesit tuaj mbeten tuajat. Ne i përpunojmë vetëm për të ofruar shërbimin, sipas politikës së privatësisë. Me kërkesën tuaj, i eksportojmë ose i fshijmë; çdo person mund të kërkojë edhe vetë fshirjen te faqja e fshirjes së të dhënave.

YouTube. Postimet përdorin Shërbimet e API-së së YouTube-it. Duke lidhur një kanal YouTube, pranoni të zbatoni Kushtet e Shërbimit të YouTube-it. Për mënyrën si Google-i i trajton të dhënat, shihni Politikën e Privatësisë së Google-it.

7. Ndërprerja

Mund ta ndërprisni bashkëpunimin në çdo kohë. Me ndërprerjen, çaktivizojmë asistentin dhe, me kërkesën tuaj, fshijmë të dhënat e biznesit nga platforma.

8. Kush e ofron dhe kontakti

Operatori i platformës është AsistentiAI, NIPT M61329506A, me seli në Durrës, Shqipëri; kontrata për shërbimin lidhet me AsistentiAI.

Për çdo pyetje mbi këto kushte: kontakt@asistentiai.com